vendredi 7 décembre 2012

ما وراء الشعارات : إتحاد الشغل و النهضة و الوطن و الأزمة : الظروف و الأسباب و النتائج



لا أعتقد أن في مثل هذه الأيام العصيبة على الوطن، يمكن الحديث عن شيء آخر غير
حرب بعض من يختبأ وراء قيادات الإتحاد و حكم النهضة

قبل الحديث عن الأزمة في حد ذاتها، ظروفها ، تداعياتها و المخارج المحتملة لها، أعتقد أن بعض التوضيحات و التدقيقات حول ما يروج و يروج له تستحق الوقوف عندها

الرواية الأولى هي حول غضب و إستنكار إتحاد الشغل لتدنيس ذكرى وفاة فرحات حشاد :في تاريخ تونس  لم يدنس أحد فرحات حشاد و ذكراه و موروثه، مثل ما فعل 
ذلك.. الإتحاد العام التونسي للشغل 

 جانفي 78 : آلاف المعتقلين، مئات الجرحى، عشرات القتلى بالرصاص، في تلك الأيام، عللت هذه المجزرة بالدفاع عن إستقلالية الإتحاد و العدالة الإجتماعية : مرت السنين و كتبت المذكرات ليتبين أن خلف الشعارات الرنانة، كان إتحاد الشغل مجرد وسيلة عند وسيلة بن عمار زوجة الرئيس بورقيبة في حرب دسائس في القصر ، لم يكن الإتحاد و قياداته سوى عرائس سكر في يد ممثلة إحدى أكبر العائلات نهبا : لعبت بها، فأكلتها، فرمتها!و ذهب مئات التونسيين قتلى لإرضاء عيون وسيلة : هل من تدنيس أكبر من هذا لحشاد و ذكراه؟



 الرديف 2008 : إتحاد الشغل يبيع حراك المهمشين و المفقرين، و يطرد مناظليه و يتبرأ منهم ليدخلو السجون و يمارس عليهم التعذيب في صفقة سياسوية رخيصة : هل من تدنيس أكبر من هذا لحشاد و ذكراه؟

 أكتوبر 2009 : إتحاد الشغل يناشد بن علي ليترشح لدورة خامسة في الإنتخابات و جريدة الشعب تفرد الصفحات الأولى للتطبيل و التزكير و العهر لواحد من أقسى و أبشع دكتاتوري هذا العصر، هل من تدنيس أكبر من هذا لحشاد و ذكراه؟




جانفي 2011 : ثورة شعبية عارمة، تهز البلاد من شمالها لجنوبها، قيادات إتحاد الشغل تقابل بن علي، تتبرأ من المتظاهرين، تدعم الدكتاتور و حزبه و نظامه و عائلاته التي مصت دماء الشغالين لعقود : هل من تدنيس أكبر من هذا لحشاد و ذكراه؟

الرواية الثانية هي أن الأنظمة المتعاقبة فشلت في تطويع الإتحاد! أو لا يستحون؟ ألم يكن الإتحاد لعشرين عاما أقل من عاهرة : بعد عن الشارع، تحالف على حساب العمال مع حكومة المناولة و النهب و التفقير، فساد حتى النخاع، الإشتراك في طحن المفقرين و خوصصة البلاد و بيعها بالصمت حينا و المناشدة و التطبيل أحيانا و سنينا طوال لصانع التغيير، لبن علي

نقطة أخيرة تستحق.. التهكم و الضحك : شيوعيون يتبنون و يرفعون صورة حشاد
تعودو سرقة الرموز و الصور! سأذكرهم فقط بموقف فرحات حشاد في سان فرانسسكو في سبتمبر 1951 في مؤتمر النقابات الأمريكية، أين طلب دعمها حتى لا تتسلل... الشيوعية إلى تونس

نمر إلى ظروف الأزمة

 إتحاد الشغل يطلق مبادرة
مبادرة شغلية؟ لا! عمالية؟ لا! إجتماعية؟ قطعا لا
هدف المبادرة هو بكل بساطة إدخال الباجي قايد السبسي للمشاركة في الحكم دون إنتخابات
غاية بمثل هذه الخسة كانت تتطلب جوا محتقنا، إحباطا، خوفا لتبرر ما لا يمكن تبريره بكلمات رنانة من قبيل : توافق، وفاق
الصفقة فشلت، قابلها تصعيد سياسوي، لأن الحكومة أقرت زيادات في الأجور ب6%، لا 
يستطيع إذن إتحاد الشغل المزايدة بالشغالين

لكن لنعد قليلا إلى الوراء و نحاول فهم إرتباط بعض قيادات إتحاد الشغل بالباجي قايد السبسي : مباشرة بعد الثورة كان إتحاد الشغل بقيادة عبد السلام جراد من أكبر الممولين و المحركين و الداعمين لجميع أنواع الإحتجاج على حكومة الغنوشي، الكثيرون إعتقدو أن هذه الديناميكية سببها شعور القيادات بالذنب و رغبة عن التكفير عن عهر و فساد و مناشدات سنوات

بعد سقوط حكومة الغنوشي و تولي الباجي قايد السبسي دواليب الحكم : حدثت الصفقة، الباجي يتعهد لجراد بطمس الملفات و عدم التتبع و حمايته إعلاميا و سياسيا و قضائيا، و الإتحاد يستكين و يتبرأ و يقمع كل أنواع الحراك السياسي و الإجتماعي و الثوري
نجحت الصفقة و باع قادة الإتحاد مرة أخرى و تحالف الشق الجرادي مع الباجي قايد السبسي



من جهة أخرى الكثيرون من قيادات الإتحاد اليوم في مختلف المستوايات هم من موروث نقابة التطبيل و المناشدة سنوات العهر، هم من المتمتعين بأراضي مقاسم قرطاج و أوسمة بن علي، هم "بورجوازية العمل النقابي" ساحقة "بروليتاريا النقابات" و لن تسمح بخسارة إمتيازاتها إلا ب"السلاح" و ستحمي الأوليقراشية السابقة التي وفرت لها   أسباب و ظروف هذه الإمتيازات، و من على الساحة السياسية اليوم يمثل النظام السابق، العائلات و الإمتيازات خيرا من الباجي قايد السبسي؟

ثم لا ننسى أنه في أواسط السبعينات، كان حسين العباسي، الأمين العام الحالي للإتحاد
 العام التونسي للشغل ناشطا و مكوننا سياسيا في نفس الحزب الذي كان الباجي قايد 
السبسي في أعلى هيآته السياسية




ثم بعض القيادات الأخرى لا تخفي إرتباطها مع بعض الأحزاب، إرتباط وصل إلى حد الترشح على قوائمها الإنتخابية( حفيظ حفيظ كمثال)! هذه الأحزاب لها إستحقاق إنتخابي 
قريب و كل فشل للحكومة، كل إضطراب هو في صالحها إنتخابيا 




هذه الأحزاب بينت في تاريخها المعاصر أنها إستأصالية لكل توجه يميني، و أنها لا تؤمن بحق المختلف عنها بالوجود و أنها تخير دكتاتورا على السماح بنفس يميني في البلاد

هل يعني هذا أنه لا شرفاء في قادة الإتحاد؟ بالتأكيد يوجد، لن أتوقف كثيرا على هذا، فهل أصبحنا في زمن الشرف فيه هو الخارج عن العادة و يستحق الذكر؟ أخير الحفاظ على تفائلي

نقطة أخرى قد تكون مهمة في فهم ظروف و توقيت الأزمة : وجود مشروع لمنع المنتسبين لحزب بن علي من العمل السياسي، مشروع قد يقضي على أحلام الباجي قايد السبسي و الجمهوري و المسار المتحالفة معه

نصل إلى تفاصيل الأزمة

 في كلمتين : تبادل عنف
تبادل عنف بين ميليشيات الإتحاد و ميليشيات رابطة حماية الثورة
من المضحكات، أن رابطة حماية الثورة هي وليدة.. إتحاد الشغل

بعد الثورة، إلتقت مصالح النهضة و مصالح عبد السلام جراد ضد حكومة الغنوشي، جراد ليحصل على عدم المحاسبة و النهضة لتحصل على ورقة ضغط سياسية، النهضة قدمت الرجال و الإتحاد قدم التأطير و طرق العمل و الحماية السياسية (النهضة في ذلك  الوقت لم تتحصل على رخصة بعد

وصول الباجي قايد السبسي للحكم و تأمينه لعبد السلام جراد كان من شروطه فك 
الإرتباط مع رابطة حماية الثورة
إنه إرتداد الديالكتيك لهيغل :) رابطة حماية الثورة ترتد على الإتحاد

لماذا لا أدخل في تفاصيل من ضرب من، من البادئ، ماذا تفعل الهراوات في مقر إتحاد الشغل، من حرك رابطة حماية الثورة؟ 
لأن هذه التفاصيل لا تغير من الواقع شيئا! يبقى تبادل عنف و التحقيق فيه من مشمولات القضاء، و قد فتح تحقيق في الأمر، أرى أنه من الشعبوية و السياسوية الرخيصة إستباق نتائجه و توظيفها و بناء الإستنتاجات عليها  قبل أن تخرج ! ثم  أن النتائج لن تغير شيئا : ميليشيات من الجانبين لا سبيل لوجودها أصلا تبادلت العنف

ردود أهل السياسة على الأزمة

يمكن تلخيصها أيضا في كلمتين : غياب المبدأية

النهضة التي كانت تدافع عن الإتحاد بعيد الثورة اليوم تشيطنه

الأحزاب التي مدت أيديها لحكومة فريعة و مرجان (من رموز بن علي في حكومة الغنوشي) تدافع بإستماتة عن الإتحاد بعد أن شيطنته و حاربته لما كانت أطرافا في الحكم

من كان يرى في إضراب قطاعي على خلفية إجتماعية خيانة للوطن أصبح اليوم يهلل لإضراب عام على خلفية سياسوية

مواقف تمليها السياسوية و الإنتهازية الرخيصة، مواقف آخر همومها الجوهر : مصلحة الوطن، أي دور و حد للعمل النقابي، السلم الإجتماعي.. و لا ترى إلا القشور : كيف يمكنني توضيف الأزمة لربح بعض النقاط حتى و إن كان ذلك على حساب الوطن

المواقف أيضا أصابها "الرش" في إحدى عينيها : البعض لا يرى إلا ميليشيات الإتحاد و توظيفها السياسي و البعض الآخر لا يرى إلا ميليشيات رابطة حماية الثورة و توظيفها السياسي

بعيدا عن أهل السياسة، إنقسم الشارع في مجمله قسمين : قسم ضد إتحاد الشغل دون التعمق في تفاصيل المشكل و نتائجه، و قسم مع إتحاد الشغل ببساطة لأنهم ضد النهضة

"هم لا يكرهون فكرك، هم يكرهونك أنت" 
جملة قد تلخص مواقف الكثيرين من المصطفين وراء إتحاد الشغل في تجمد فكري و غوغائية و التلويح بشعارات مستهلكة و "تكفير بالعمال و العمل النقابي" كل من يتجرأ على طرح الأسئلة، إتحاد الشغل هو فقط ضد النهضة هذا كاف، الباقي مجرد تفاصيل 

"أنصر أخاك ظالما أو مظلوما"
 تلخص طريقة تفكير الكثير من أنصار النهضة، ينصر النهضة ثم يبحث عن أبعاد و تداعيات المشكل، هذا إن كلف نفسه عناء البحث أصلا

نصل إلى الدعوة للإضراب العام

إتحاد الشغل في الأصل وجد للدفاع عن العمال و حقوقهم، لكن من سخرية القدر أنه بالدعوة للإضراب العام يتحول العمال و الكادحون لدرع لمنظمة ساهمت في سحقهم و إفتكاك حقوقهم لسنوات طوال، يكفي التذكير أن المقاهي المحيطة بمقر الإتحاد في العاصمة، المقاهي التي يشرب فيها النقابيون قهوتهم الصباحية، المقاهي التي تربط النقابيين صداقة مع أصحابها و لا يدفعون ثمن القهوة غالبا، لا يتمتع فيها العمال بأبسط حقوقهم من تغطية إجتماعية و غيرها.. و لم يحرك حامو العمال ساكنا! القهوة أغلى من المبادئ، اليوم يطلب النقابيون من هؤلاء العمال الإضراب و خسارة أجر يوم يقتطعونه من خبز أبنائهم للدفاع عنهم! أ وليس القدر ساخرا حين يريد؟

ثم المشكلة سياسية بالأساس! سب رئيس النهضة الإتحاد؟ سبوه! لديكم مشكل سياسي مع النهضة؟ حلوه سياسيا! ما دخل العامل و الفلاح و الطالب و المفقر في أموركم السياسية؟ إلى متى يظل وقود حرب يدفع ثمنها من قوته و لن يجني منها شيئا! حرب لوجود الإتحاد؟ ماذا فعل له الإتحاد لعشرين عاما غير المشاركة في تفقيره و إستغلاله، أحيانا فقط مقابل قهوة مجانية؟

ثم تبادل العنف من إختصاص القضاء و قد أقر حسين العباسي بوجود تحقيق، فلماذا أخذ 
قرار بهذا الحجم قبل وصول نتائج التحقيق




الدعوة للإضراب العام هي توريط للحكومة  لكن الحكومة أخذت موقف في صف الإتحاد و بعيد عن الإصطفاف الحزبي بشهادة نجيب الشابي نفسه، فلماذا إذن الإصرار على توريط الحكومة أصلا و هي قد ترفعت عن الصراع؟

ثم أن الإضراب العام هو عقاب للوطن، للتونسيين جميعا، عقاب جماعي لا مبرر له! ما ذنب التونسيين في مهاترات سياسوية؟

الإضراب العام على خلفية سياسية يحول إتحاد الشغل إلى حزب سياسي، ذو مواقف سياسية و حزبية، حتى أن بعض قياديه قالوها علنا : نعم الإتحاد قريب من بعض الأحزاب و هذا موجود في دول عديدة أخرى

تحت بورقيبة و بن علي كان من الممكن فهم تسييس إتحاد الشغل : الفضائات السياسية مغلقة و الهيكل الوحيد لبعض حرية الحركة هو الإتحاد
حرية الحركة السياسية في الإتحاد دفع ثمنها العمال، كان ثمنها السكوت عن حقوقهم و الصمت عن سحقهم لا بل و المشاركة في ذلك

اليوم، الحرية السياسية مكفولة، فإلى متى على العمال دفع هذا الثمن؟

ثم أن تسييس الإتحاد بالمعنى الحزبي له تداعيات خطيرة : هو يعني أنه من حق كل حزب إذن أن تكون له نقابته، و لكل نقابة ميليشيتها، لتتحول تونس إلى لبنان سنة 1974 : كل توجه سياسي له ميليشيا إستعدادا لحرب يكون وقودها العمال! أم أن تسييس النقابة و العمال بالمعنى الحزبي حكر على طرف دون طرف؟

ثم فلنفترض جدلا أني منخرط في إتحاد الشغل، و إنخراطي ناتج عن إيماني بقيمة العمل النقابي و دوره في ضمان حقوقي
اليوم الإتحاد يستعملني و يستعمل إنتمائي له ليأخذ مواقف سياسية، أو ليست هذه سرقة؟ ما أدراه أني أوافق على موقفه السياسي؟

إستغل الإتحاد منتسبيه لعشرين سنة فقط لتسمن أرصدة قياداته البنكية، اليوم إذا ما أراد الإتحاد لعب دور حزبي، فإحتراما لمنتسبيه عليه أن يكف  عن إستغلالهم و يقدم برنامجا حزبيا سياسيا عليهم، حين يوافقونه عليه يصبح له الحق للحديث السياسي بإسمهم

ثم فلنأتي إلى مطلب الإتحاد لإلغاء الإضراب : حل رابطة حماية الثورة لسبب تكوينها 
لميليشيات

من ناحية شكلية هو طلب تعجيزي! رابطة حماية الثورة جمعية إذا لا يمكن حلها إلا بأمر من القضاء، دعوة الإتحاد لتدخل سياسي للضغط على القضاء هو أمر غير مقبول شكلا

هل حن قياديو الإتحاد لأيام القضاء لعبة في يد بن علي؟ هل هذا تصورهم لتونس؟ هل هذه مساهمتهم في بناء الإنتقال الديمقراطي : الدعوة لتدخل التنفيذي في القضائي؟

 ثم لنفرض جدلا أن أمر رابطة حماية الثورة رفع للقضاء، أو ليس تعيين أسبوع فقط قبل 
الإضراب، أسبوع للتحقيق و الإتهام و الحكم و الدفاع و الإستئناف هو من باب التعجيز؟

 أن هذا المطلب هو فقط لتغطية عين الشمس بغربال، فقط لإعطاء صورة واهية أنه يمكن تفادي الإضراب في حين أن من يرفع هذا المطلب هو يريد الوصول للإضراب مهما كان الثمن

من ناحية سياسية، هل من الصدفة أن يكون المطلب هو نفس مطلب حزب الباجي قايد السبسي؟ هل من الصدفة أنه بعد أن رمى "مناظلو" إتحاد مهني (إتحاد الفلاحيين) المولوتوف على مجموعة من أنصار رابطة حماية الثورة و تسببو في قتيل و ثمانية حرقى حروقا خطيرة، و بعد أن نادى حزب الباجي قايد السبسي الذي تبين أن من رمى و خزن المولوتوف من قياداته بالجهة (في إختلاط واضح بين العمل المهني النقابي و المسؤولية الحزبية) حل رابطة حماية الثورة، أن يتبنى الإتحاد نفس 'المطلب الجاهز"؟

ثم من ناحية منطقية، إذا كان السبب للمطالبة بحل رابطة حماية الثورة هو تكوينها لميليشيات، فهذا أيضا ينطبق على إتحاد الشغل! هو أيضا له ميليشيات مدفوعة الأجر و حتى الهراوات تشترى من ميزانية الإتحاد! فالمنطق يقتضي إذن بحل ميليشيات الطرفين



كيف سيكون المخرج من هذا المأزق؟

أعتقد أن ردة الفعل بهذا العنف مردها هو عقاب النهضة على إفشال مبادرة الإتحاد التي كان هدفها إرجاع الباجي قايد السبسي للحكم دون إنتخابات، التهدأة إذن ثمنها ، و خلافا 
للشعارات الرنانة هو إعادة فرض هذه المبادرة

أعتقد أننا سنصل إلى الإضراب، إلا إذا لمس قياديو الإتحاد أن إمكانية فشله كبيرة و لن يجد صدى في الشارع، أو إذى إرتفع صوت القواعد في الإتحاد، حينها قد يختبؤون وراء 
كلمات كمصلحة الوطن



إذا وصلنا للإضراب، فقد نشهد حرب شوارع! قالها عدنان الحاجي : سننجح الإضراب و لو بالقوة و سنمنع فتح المحلات :قد نسير حثيثا نحو حرب شوارع بين ميليشيات الإتحاد لفرض غلق المحلات و ميليشيات رابطة حماية الثورة لفرض فتحها

 سيناريو كارثي، يستدعي منقذ : رشيد عمار و بيانه رقم واحد إن كانت الغلبة لميليشيات رابطة حماية الثورة أو الباجي قايد السبسي(و لو بعد حين، عبر إضعاف الحكومة و المساومة على قانون منع المنتسبين لحزب بن علي من العمل السياسي) إن كانت الغلبة لميليشيات الإتحاد.. الذي سيفرض إذا مبادرته..بالقوة
 أو ربما ضغط و تدخل خارجي لحل الأزمة  و هذه من سخرية القدر فالإتحاد تحت حشاد كان هدفه محاربة الإستعمار و التدخل الأجنبي، اليوم البعض ممن يرفعون صوره 
و يتشدقون بذكراه قد يكونون مطية لهذا التدخل




و النهضة في كل هذا؟ هل هي الملاك الطاهر الضحية المسكين؟ قطعا لا! النهضة لم تحسن التواصل و لا الحكم و لا المناورة و لا كسب الأصدقاء و لا تحييد الأعداء، تصرفت بصفاقة و صلف و تعال بعيد الإنتخابات، مزقتها حرب الأجنحة، غابت عنها الرؤية و التصورات، بعد أشهر الصلف و موتو بغيظكم إنساقت نحو محاولة إرضاء الجميع فخسرت الجميع، غابت عنها الشجاعة السياسية و تجانس القرار، هي فقط تحصد نتائج عدم خبرتها السياسية و غياب نظرتها المتجانسة للحكم و عدم مواجهة نفسها لفصل صراع الأجنحة داخلها، صراع الأجنحة الذي منعها من الوضوح و كبلها عن أخذ المواقف و عن الحكم بفاعلية


قد يفهم قارئ المقال أني معاد للعمل النقابي و حقوق المفقرين و الكادحين(تهمة جاهزة لكل من يشكك في الإضراب و يحاول ربط ما يحدث بمنطق سياسي لا يقتصر على حدود الحدث، بل يرى ما سبقه و يستشرف ما ورائه): الحقيقة عكس ذلك تماما

شخصيا أعتقد أن فاقد الشيء لا يعطيه، إذا كان الإتحاد يريد أن يعيد الإعتبار لحشاد و صوره و ذكراه، عليه أن يبدأ بنفسه : يحاسب فاسديه، يعيد أراضي مقاسم قرطاج التي تسلمها قياديوه هدايا من بن علي إلى الشعب، يفتح أرصدة قيادييه البنكية للتدقيق، يراجع بيروقراطيته المقيتة و الثقيلة، يعتذر عن سنوات المناشدة، عن تزكيته لبن علي لدورة خامسة، يبني إتحادا يفخر به حشاد، يكون همه الشغالين و حقوقهم و دفع التدخل الأجنبي و المصلحة العليا للوطن، لا أن يدعو لإضراب عام لأسباب سياسوية في شعب نصفه لا 
يشتغل أصلا و نصفه الآخر يتظاهر بالشغل منذ عامين




lundi 8 octobre 2012

أبعث جواب، وقف مهزلة! فاعل أو نبار : لك الإختيار




بعد إتهامهم لأحد النواب بالتدليس و/أو التحيل في خصوص مشروع قانون التقاعد،نهار الإثنيين سأراسل وكيل الجمهورية لإعلامه بإمكانية وقوع جريمة و مصطفى بن جعغر لإحداث لجنة للتحقيق



هذه المهازل تستمر لصمتنا و لسلبيتنا، يزينا من لوغة غلطونا : كان فمة تدليس أو تحيل : النائب مكانه السجن و ليس المجلس، و كان الأخرين شموها قارصة قامو يكذبو و يفلمو علينا : فضحهم و عقابهم إداريا هو أضعف الأيمان




إذا إنت زادة فديت م التفليم و السلبية و التنبير :كون فاعل : خوذ زوز أوراق بيض، إكتب وحدة : عريضة للسيد وكيل الجمهورية و وحدة لمصطفى بن جعفر



أبعث جواب : أوقف مهزلة



هذا مثال للرسالة لوكيل الجمهورية 







بالنسبة للسيد وكيل الجمهورية : العنوان : السيد وكيل الجمهورية المحكمة الإبتدائية بتونس

بالنسبة لمصطفى بن جعفر : العنوان : مصطفى بن جعفر المجلس التأسيسي باردو 2000 



فاعل أو نبار : لك الإختيار


jeudi 27 septembre 2012

Interview with MR Chris O'Connor the British amabassador To Tunisia



شكر جزيل للسيد كريس أكنور على وقته الثمين

الأسئلة تمحورت حول بريتش غاز و مراجعة عقودها ، علاقة الحكومة البريطانية باللاجئين السياسيين السابقين على ترابها (من حركة النهضة)، الأموال التي وزعتها السفارة على الجمعيات التونسية، مواقف أوروبا، هل التشجيع على التداين هو حقا مساعدة، كيف تقيم المملكة المتحدة حالة الحريات و الإنتقال في تونس، قانون الإعتداء عى المقدسات، أسباب و تداعيات أحداث السفارة الأمريكية، نوايا الإستثمار المباشر و التعاون 

اللقاء بثلاث لغات : عربية فرنسية و إنجليزية

شكر جزيل لفيونا روميري بدون مساعدتها لن يكون من الممكن تسجيل هذا اللقاء

شكر لحارس السفارة على لطفه و تفهمه (تصرف نادر من حراس السفارات عادة

الفيديو دون حقوق ملكية فكرية : يمكن تداولها، إستعمالها، قطعها، إستعمالها للربح المادي دون إلزامية ذكر المصدر


شكرا لعمران عبد الكافي لتمكينه من حسابه يوتوب لنشر الفيديو



 Un Grand Merci a Mr O'Connor pour son temps.

 Les questions tournaient autour de British Gaz et ses contrats en Tunisie, la relation du gouvernement britannique avec les ex-réfugiés en Grande Bretagne (principalement les dirigeants de Nahdha), l'argent offert par la Grande Bretagne aux association tunisiennes, les positions de l’Europe,   l'encouragement a l'endettement est il vraiment une aide, comment voit la grande Bretagne l'état des liberté, et la transition en Tunisie, la loi d'atteinte au sacré, les causes et conséquences des incidents de l'ambassade américaine, les intentions d’investissement direct et de coopération.

 L'interview se passe en 3 langues arabe, français et anglais.

 Un grand merci a Fíona Rumney qui a rendu cet interview possible.

 Un grand merci au gardien de l'ambassade, d'une gentillesse et compréhension rares pour des gardiens d'ambassade :) La vidéo est sous copyleft : vous pouvez la partager, l'utiliser, la modifier, l'utiliser a but lucratif sans obligation de citer la source.

Merci a Omran AbdelKéfi pour la mise a disposition de son compte youtube pro pour uploader la vidéo



Thank you to thanks to Mr O'Connor for his time.

The questions were about the British gas and its contracts in tunisia,the relationship between the britsh goverment and the ex refugees in Britain (mainly the ones from nahdha),the money which was offered from Britain to the tunisian associations,Europe's positions,does really the encouragement for debts represent a help,how Britain sees the state of liberties and the transition in Tunisia,the law of sanctuaries protection,the causes and the consequences of the american embassy incident,the intentions of direct investment or corporation

The interview was done in 3 languages:Arabic,French and English

Thank you to  Fíona Rumney who made the interview possible

A big thanks to the guardian embassy who was realyy kind ,something rare to find in the guardians of embassies

The video is under copyleft,you can share it,use it,edit it,use it for a lucrative goal without obligation to mention the source

Thank you to Omran Abdelkefi for making available its pro youtube account to upload the video

 

jeudi 16 août 2012

فريدم هاوس..المقال الممنوع. الجزء الثالث




في أول الجزء هذا بش نحاول نجاوب على بعض الأسئلة و التساؤلات الي جاتني بعد الجزئين الي تعداو


فمة شكون قلي : ياسين هذا الكل نعرفوه، إش جبت جديد

نحب نذكر الي أنا مدون موش مخرج سينمائي، أنا نبحث و نلم موش بش نألف و نخترع، و المقال هذا بأجزائه هو محاولة لجمع ما كتب هنا و هناك، موش بش نصنع حاجة من مخي


سليم عمامو كتبلي الي موش هو الي حكالي علي يقراو في سفارة أمريكا، بما أني نستغرب ألزهايمر في عمر 36 باش نقول نسى و بما أنه ما عنديش بلورة سحرية نشوف فيها و ما عنديش منين نوحى بأساميهم (الكلهم لبدو، حتى واحد ما نجم يصك و يقول موش صحيح)،  نستنتج الي شلة المرح نزلو عليه كيفاه صبيت بينا، واحد ما ينجمش ياخو دروس  من السفارة الأمريكانية في راحة من عقلو؟ عاد هانو يسل فيها و بره


فمة شكون قلي بالكشي مدكات، لعبو بيهم و ما يعرفوش
إيه، ممكن، أما الي لعبو بيه توة معادش ينجم يقول غلطوني : يجي يعترف، يفسر، يفضح الكوازي،و يعتذر من الشعب التونسي،أما مدام مزال يقبض و يصب و يسمع في التعليمات: مزالش يقول مدك و ما نعرفش؟ هاذي عمالة مع سبق الإصرار و الترصد

فما شكون جاني  قلي و بره فريدم هاوس عاونتهم و أعطاتهم الفلوس، ماهم ياخذو أما يجبدو بيهم و ما يسمعوش كلامهم
عيشو، خاطر إسمها فريدم هاوس سيدي تاتا، أنا جايبلو أدلة الي هي ذراع و كالة الإستخبارات المركزية،و هو بش يلعبهالي عم الطيب باشا بش يعديها عليهم، مزالت النية


الأستاذ زهير مخلوف مشكور كتب دفاعا على ليليا الوسلاتي و على رحلتها للسويد، على قد ما اوفقته الرأي على الجزء الأول في ما كتب (التعليق موجود كاملا في الجزء السابق) على قد ما نختلف معاه في الباقي : ما فماش قطوس يصطاد لربي سي زهير، و إنجمو ديما نلقاو تبرير و عذر للي مشى يقريو و يوريو فيه

و كمثال، يتحول القنطار من مقاوم، إلى إرهابي، إيه نعم إرهابي





شكون الي قدم سليم عمامو للسفارة الأمريكانية؟



نحكيو مرة على تويتر علنيا، و تجبد الموضوع، و تطرح سؤال : إش يعمل سليم في سفارة أمريكا نهارين قبل نهار على عمار؟
آمنة بن جمعة إتدخلت و قالت (في تويت بوبليك) الي هي الي قدمت سليم للمسؤولين الأمريكان
بصيفتها شنوة؟ الله و أعلم


إيه، و قداش هونت فريدم هاوس على مناضليها و عملائنا؟


السيت هذا 
http://usaspending.gov


يعطي إش صرفت الحكومة الأمريكانية، تره ناخذو مثال ع الطاير تره



في 2011، فريدم هاوس تونس: 1,319,025$ زوز مليارات و ميا و تلاثة و تلاثين مليون، دنوس ينطح دنوس، ناس تعوم و تغطس في الفلوس، إمالة العمالة بلاش هي؟





إلي ضهرتلو التصويرة صغيرة، ينزل عليها توة تكبر و يقرى بعينيه الأرقام الي قدمتها

سليم عمامو لما سؤلوه، ما لعبهاش كيما بعابص الكبار الي في بالها فاهمة و جبد غناية عقلية المؤامرة، و أقر بيد وكالة الإستخبارات الأمريكية في تدريب و تلقين و توجيه المدونين

هام زوز تسجيلات : آمنة بن جمعة تستظيف سليم عمامو، و من بعد سليم يحكي وحدو، ما نيش بش نعمل حتى تعليق على التسجيلات الزوز، كبار و بأمخاخكم و كل واحد يكون رايو وحدو






نواصلو



ليلة راس العام 2010، فريدم هاوس، عن طريق إحدى أقدم أصدقائها في تونس: هويدة أنور، عملت لمة في دار هويدة بمباركة ولد المبروك جمعت فيها جماعة فريدم هاوس و ناس أخرين من دومان التدوينات و الفايسبوك، على أساس حفلة و ألعاب سحرية و توزعت تعليمات الإدارة الأمريكية بضحك و لعب





ثمة حاجة تنجمو تعرفو بيها بعض عملاء فريدم هاوس، أدخلو و شوفو صفحاتهم و مدوناتهم: ما نحكيوش على إسرائيل، ما نجبدوش على القناصة، و نسايسو الذات العمارية

باهي، و سمير ديلو؟


في الصفحة هاذي الي تابعة لموقع فريدم هاوس

http://www.freedomhouse.org/article/human-rights-day-2006-despite-progress-abuses-continue-around-globe


يذكرو إسم سمير ديلو



الي يقرا النص، يلقى الي فريدم هاوس تشيد بيه كسجين سياسي، من غير ما يؤكد أو ينفي علاقته المباشرة بهالمنضمة




في 28 جانفي 2011 كان لي لقاء مع سمير ديلو و واجهتو بالموضوع
التسجيل هاو هنا




 ينكر تماما و قطعيا علاقتو مع فريدم هاوس و يقول إنه مشى شهرين لأمريكا بهدف

 تركيز مركز لمناهضة التعذيب في تونس، شهادتو قدامكم




ثمة فقرة كتبتها في الجزء الأول، هاو بش نعاود نحطها مع مثال باش الي ما صدقنيش، ما عادش يلقى ما يزايد


كيفاش تخدم فريدم هاوس؟



تختار عباد، تمولهم، إتدربهم، تعاونهم، تستغل نفوذها باش تعطيهم الجوائز و تخدمهم في الإعلام و تستعمل ريزواتها باش تلنصيهم و توصلهم لمراكز القرار و التأثير على الناس في الحكومات و الأحزاب و الإعلام و المجتمع المدني : بلوغة أخرى تصنع زعامات تنجم بيهم تأثر على الشعوب



سفيان الشرابي كمثال



قلنا كيفاش؟ تمولهم : سفيان الشرابي يتحصل على أكثر من منحة من فريدم هاوس، وحدة منهم على الأقل ب50.000 دولار أكثر من 80 مليون

إتدربهم؟ السيد عام يقرى صحافة في السفارة الأمريكية، يا بمبك يا بمبك

تستغل نفوذها باش تعطيهم جوائز؟



موش أحسن فايسبوكور، موش أبن مدون، لا لا أقوى صحافي! قاري عامين بعد الباك، يخربش على الفايسبوك.. أحسن صحافي



للي يحب المطالعة، فريدم هاوس و سفيان الشرابي، قصة حب لا تخفى على أحد



http://www.freedomhouse.org/article/freedom-house-hosts-tunisian-journalist

http://www.youtube.com/watch?v=LHe0PdinBTE

http://expression.freedomhouse.org/content/feature/freedom-house-hosts-tunisian-journalist



الي عندو شوية وقت و يحب يوسع بالو، هاي لعبة متع أرديناتور، بلاش، كانت تستعملها فريدم هاوس لتدريب أبطالها

http://fmp.mediaworksit.net/AForceMorePowerful.iso






الجزء الثالث وفى، إن شاء الله الجزء الرابع يكون مخصص لمحسن مرزوق أو كيف تصبح العمالة وجهة نظر

إن شاء الله يكون فيه أكثر تفاصيل، ما حطيتش تفاصيل على سفيان الشرابي في الجزء هذا: زايد ذبحان الجيفة

نختم كيما ختمت باقي الأجزاء

 نتمنى الي صحافي محترف يقوم ببحث أعمق و إنه وكيل الجمهورية يفتح تحقيق في الخيانة العظمى ضد كل من باع بلادو لأجل حفنة دولارات

jeudi 9 août 2012

فريدم هاوس..المقال الممنوع. الجزء الثاني


بالنسبة للي قراو الجزء الأول م المقال، نحب نأكد على صعوبة الحصول على المعلومات للجزء هذا : ما يجيك حتى حد يقلك راني عميل

بش نحكي علي نعرفو كيما عرفتو، و ماني بش نحشم و إلا نخاف من حد، و نعرف ملييييح مليح إش يستنى فيا بعد التدوينة هاذي، كل ما نحل فمي على فريدم هاوس و فلوس فريدم هاوس و تدريب فريدم هاوس إلا ما ناكل ما كلا الطبل

أول مرة سمعت بفريدم هاوس، كان في مقال في 2009 لخالد الكريشي خرج في الجريدة الحزبية للتكتل مواطنون ، عاودت لقيت الأرتيكل على الموقع متع اللجنة العربية لحقوق 
الإنسان

ناخذلكم مقطع من المقال 

" ورغم إنكشاف الطبيعة الحقيقية لمنظمة "فريدم هاوس " أمام الجميع وجدت موطئ قدم لها هنا في تونس وبالتحديد في قطاع المحاماة عبر مشاركة وفد من المحامين في بعض الدورات التدريبية التي نظمتها المنظمة سنة 2007 في كل من المغرب وكندا التي مكثوا فيها أكثر من شهرين ،والمفزع الذي يجعلنا ندق ناقوس الخطر ويستوجب تدخل هياكل مهنة المحاماة والمحامين عموما لإيقاف هذا التمشي السرطاني هو عمل هذه المجموعة على إستقطاب المحامين المتمرنين والشبان وحتى لا تفتك قلاع المحاماة الحصينة من الداخل
وإذا أردتم معرفة من هم هؤلاء المحامون المتعاملون مع منظمة فريدم هاوس فلن تتعبوا أنفسكم كثيرا فقط هناك خيط سميك يجمعهم :
فهم من جماعة اللاءات الثلاث ،لا طعم لا لون لا رائحة أو بالأحرى فهم ليسوا شيوعيين ولا إسلاميين ولا قوميين ولا حتى تجمعيين ..فهم أعداء السياسة والإيديولوجيا كما تشبعوا من أستاذهم المحافظ الجديد فرانسيس فوكوياما صاحب "نهاية التاريخ وخاتم البشر

هم من تخصص في ترويج الإشاعات المقززة التي تقشعر منها الأبدان داخل قطاع المحاماة ،ولا يتورعون عن كتابة المقالات غير الممضاة أو الممضاة بأسماء مستعارة والتي تقطر إبتذالا وإسفافا إذ ليست لهم الجرأة والشجاعة ليعبروا عن أرائهم مباشرة بل يتسترون وراء يافطات براقة كما تتستر الإدارة الأمريكية والمحافظين الجدد وراء منظمة "فريدم هاوس " وأهدافها البراقة التي تبهر الأبصار... ،وحين حاولوا تمرير عريضة ضد هياكل المهنة قبل الجلسة العامة السنوية الفارطة خارج الأسلوب الديمقراطي المتعارف عليه داخل قطاع المحاماة لم يتحصلوا سوى على 37 إمضاء !!من أصل أكثر من ستة آلاف محامي تونسي.
هم من دافع في المعركة الأخيرة حول مشاركة بعض المحامين في البرامج التلفزية الصفراء عن الإعلام الأصفر وعن التشهير بزميلهم وإفشاء أسرار ملفات التأديب وخرق القانون والضرب عرض الحائط بأخلاقيات مهنتي المحاماة والصحافة
"

المقال كامل تلقاوه هنا
 http://www.achr.nu/art666.htm



ثاني مرة سمعت بحكاية سفارة أمريكا و العسول هذا، كان نهارة 18 ماي 2010. و قتها نحضر في نهار على عمار، كلمت سليم عمامو، قلي عندي قضية في سفارة أمريكا، نسخايبو يفدلك، هيا كي تقابلنا قلي إلي مشى قابل مسؤولين على الإعلام و سمالي برشة ناس عندها مديدة تقرى في دروس صحافة في السفارة الأمريكية! إيه نعم السفارة الأمريكية تقري في الصحافة، شنية المشكل! و من العباد الي سماهملي : خميس الخياطي (بعد ما شاب هزوه للكتاب)، سفيان شرابي، آمنة بن جمعة، بنت إدريس (مصير دستن

الحق وقتها ما عدلتش ع الحكاية برشة، في مخي سفارة أمريكا و ريق هاذم متع أفلام، موش من عاداتنا و تقاليدنا


أيامات نهار على عمار زادة، وقت مزلت وحدي و ما لقيتش شكون يصحح معايا على مطلب تنظيم مظاهرة، نحكي مع ليليا الوسلاتي
 liliopatra
وقتها قلتلها صحح معايا إنت، قتلي لا أنا ما نحبش مشاكل أنا طالعة بش نعدي شهر في السويد نتدرب على صناعة الزعماء. و قتها ما صدقتهاش، نسخايبها تعلات و بره، طلعت للسويد و قراوها و وراوها


أيامات قبل الثورة خرجت ويكيليكس برشة خنار، و على سبيل المثال لا الحصر
البرقية هاذي




معناها سفير أمريكا ما قلقوش حجب اليوتوب و حجب موقع المفوضية العليا لحقوق الإنسان و حجب مواقع أحزاب معارضة.. عمل طاولة و كراسي و ما قلقو كان حجب 
موقع فريدم هاوس. ماني بوهالي أنا عاد وقتها ما فهمتش 


البرقية كاملة هاي هنا
https://tunileaks.appspot.com/2011/07/8/Senior-GOT-Official-calls-for-new-page-in-US-Tunisia-relations.html



البرقية هاذي فيها مقطع زعمة الي لازم مكونات المجتمع المدني تتدرب عند فريدم هاوس 
http://cables.mrkva.eu/cable.php?id=33109

في البرقية هاذي ، ممثل فريدم هاوس تونس يعلم السفير الأمريكي الي المقربين لبن علي  لازمهم تطمينات الي في حال تغيير النظام
و رحيل بن علي



البرقية كاملة هاي هنا

البرقية هاذي تفيد إلي فريدم هاوس تحكي على برامج تدريب فريدم لناشطين توانسة، الي يقرى يشوف الي البرنامج هو لصناعة الزعماء و دسهمهم في الشعوب و الرأي العام



البرقية كاملة هاي هنا

البرقية هاذي تحكي ع الفلوس، و كيفاه ما يلزمش تفوح و تخرج حكاية الفلوس و الي التغطية على التمويلات من مهام فريدم هاوس



البرقية كاملة هاي هنا



البرقية هاذي تحكي على وجوب حماية ناشطي فريدم هاوس الي يجيو تحط غطاء 
Blue Umbrella
و بالبرقية هاذي فهمت علاش شكون يقول كلمة يوقفوه و شكون يقلب الدنيا عمرو ما يتوقف،أهيا 



أيامات الثورة، فمة مدونين توقفو، موش الكل.. فمة حتى الي يشدو عندو قنبلة ما يتشدش 

أيامات الثورة فرحت الحق وقت هيلاري كلينتن تكلمت على المدونيين الي توقفو، فرحت خاطر فيهم أصحابي و ناس تغصرت و توقفت معاهم تحت بن علي أيام الكلمة جمرة

أيامات الثورة تسائلت، هيلاري كلنتن تتكلم على إيقاف مدونين و ما تتكلمش على 100 مغدور بالرصاص؟ بلد غريبة في عالم عجيب

بعد الثورة سمعت الي فمة شكون من المدونين مشى إتدرب في بيروت و في القاهرة على كسر الصنصرة مع فريدم هاوس


توة نتدروشو على بعضنا؟ كسر الصنصرة؟ تي أي شاب تونسي عمرو أكثر من 14 عام يعرف يركب بروكسي و يخدم الهوت سبوت، تي لواه ماشين لبيروت؟ تي كان مشاو بوبلينات الحومة راهو سعيد علمهم و وراهم

الحكاية ما دخلتش مخي الحق، إلي عرفتو إلي آمنة بن جمعة مشات لوحدة من الدورات هاذوكم و سليم عمامو مشى للزوز


الأرتيكل بدا يطوال، باش ما نكثرش و ما نطولش، إن شاء الله نكمل نحكي على الي عرفتو على فريدم هاوس تونس حسب الترتيب الزمني الي عرفتو فيه مع الأسماء و الأدلة في الجزء الثالث

نختم كيما ختمت الجزء الأول

نتمنى الي صحافي محترف يقوم ببحث أعمق و إنه وكيل الجمهورية يفتح تحقيق في الخيانة العظمى ضد كل من باع بلادو لأجل حفنة دولارات






mardi 7 août 2012

فريدم هاوس..المقال الممنوع. الجزء الأول



فريدم هاوس، كلمة سمع بيها الأنترنات التونسي و فاحت ريحتها عندها مدة، و ريت برشة عباد تلصق في كلمة منا و كلمة من غادي من غير  ما حب حتى حد يفرك الرمانة و يحكي على الموضوع


نعرف الي المقال هذا بش يعملي برشة برشة عداوات، كل ما نحكي على فريدم هاوس، ياكلولي القلب متاعي و يسبوني و تتفبرك التصاور و بقية الخنار..خاطر لدى أغلب معشر المدونين إنك تحافظ على الصورة المشرقة لعالم التدوين و الصحبة الوهمية و التضامن الزائف و قوس قزح و العصافير تزقزق أهم من كشف الحقيقة

فمة الي مغرومين بريق تشليك زعمة كل من يجبد ع الموضوع و يحاولو يصوروه على إنه مهووس بعقلية المؤامرة
الي أحنا نسميوه مؤامرة و نتندرو بيه، هوما يسميوه إستراتيجيا و علاقات خارجية، و تاريخنا هو أرشيفهم

المقال هذا مقسوم لأربعة أجزاء : جزء أول هو تعريف فريدم هاوس : شنية و منين جات و إش تعمل و كيفاه تخدم، الجزء الثاني هو تقديم بعض الرؤوس متع فريدم هاوس باش نفهمو شكون وراها، الجزء الثالث هو : إش قالو في فريدم هاوس، و الجزء الرابع : فريدم هاوس تونس

الأجزاء التلاثة الأولى أغلب ما فيها هو نتيجة أبحاث ع الأنترنات، و بش نحاول على قدر المستطاع نعطي المصادر، الجزء الرابع ماهوش بش يكون بدقة الأجزاء الأخرى و مبني على معلومات تحصلت عليها بالطرق الخاصة متاعي، ماني مدون حتى أنا، و نخليكم تتخيلو صعوبة الحصول على المعلومات : ما يجيك حد يقلك أنا عميل، لكن كيما يقول المثل : كان موش عماهم، ما نعيشوش معاهم

شنية فريدم هاوس؟

تأسست مؤسسة فريدوم هاوس في اكتوبر 1941، توصف روحها بأنها "صوت واضح للديموقراطية والحرية في جميع أنحاء العالم


تخرج تقرير سنوي على حالة الحرية و الحريات في بلدان العالم، إيه نعم، عندها تيرموماتر تحطو للدول و تشوفلهم السخانة و بالطبيعة أي دولة تعمل هكة و إلا هكة فيسع تطلعلها السخانة و تقعد ضحكة بين الأمم

أول تأسيسها كان لحشد الدعم الشعبي في أمريكا و التأثير على الرأي العام الأمريكي باش يتحمس لدخول أمريكا للحرب العالمية الثانية وقت الي كانت المشاعر الإنعزالية غالبة في الشارع بتمويل و تشجيع من الرئيس روزفلت

دخلت أمريكا الحرب العالمية الثانية و وفات الحرب و بدات الحرب الباردة، إيه إش بش تقعد تعمل فريدم هاوس؟

حطت روحها زعمة محاربة للشيوعية و ناشرة للديمقراطية في الدول الي مالت لليسار

و عندها طرق فعالة لنشر الديمقراطية في هاك الوقت : تجنيد و تدريب الكوبيين لقلب كاسترو، تخريبات في أكرانيا، برشة أصدقاء الديمقراطية يحكيولها بالباء و التاء إش صاير في بلدانهم، حصيلو جو كبير

أقوى إنتقادات كانت لشيلي العراق الصين روسيا و كوبا

المنظمة من مواقفها التاريخية دعمها لمخطط مارشال و لقيام حلف شمال الأطلسي

دعمت برشة أندري ساخاروف الحاصل على جائزة نوبل للسلام عام 1975 في نشاطو الحقوقي

عام 1963  فيلق السلام (منظمة أمريكية الهدف المعلن متاعها نشر و الدفاع على القيم و الأفكار الأمريكية في كل أنحاء العالم) و وكالة المعلومات الأمريكية
 United States Information Agency
  صنعو مشروع
 BOOKS USA

عام 1969 فريدم هاوس إحتوات
 Books USA
 و أصبح جزء منها

في السنوات الأخيرة خدمت برشة على تحويل و قلب الأنظمة في كل من أكرانيا، صربيا، و حسب صفحة فريدم هاوس على ويكيبيديا : تونس

كيفاش تخدم فريدم هاوس؟

تختار عباد، تمولهم، إتدربهم، تعاونهم، تستغل نفوذها باش تعطيهم الجوائز و تخدمهم في الإعلام و تستعمل ريزواتها باش تلنصيهم و توصلهم لمراكز القرار و التأثير على الناس في الحكومات و الأحزاب و الإعلام و المجتمع المدني : بلوغة أخرى تصنع زعامات تنجم بيهم تأثر على الشعوب

و فريدم هاوس مسجلة برائة إختراع : القطوس الوحيد الي يصطاد لربي : تمويل و دعم و جوائز و علاقات و تعيينات في الحكومات و إعلام، هذا الكل لأجل عيون الديمقراطية.. يا بت إنت يا بت، يا ديمقراطية يا أبو عيون حلوين

لا سيدي، الدعم هذا مقابل حاجة وحدة : العمالة

تولي يا بمبك يا بمبك عميل : الموقف الي يقولولك خوذو تاخذو، إتدافع على أمريكا و إسرائيل و يستحيل تجبدهم بالخايب على لسانك، إتدافع على الديمقراطية الأمريكية و بيما إنهم بش يلنصيوك في الإعلام و إلا السياسة و إلا المجتمع المدني، ما فيها باس تحكيلهم و تعلمهم إش صاير في بلادك و وين لنصاوك.. موش على حاجة راهو يمشيش مخك لبعيد؟ الكله لهاك التقرير الي يخرجوه، موش على حاجة أخرى

من الإخر غطاء لمنظمة جاسوسية

هيا أخرجولي جماعة المؤامرة و قولولي جيمس بوند و إبداو تكريكو، لكن هذا ما يبدل شيء من الواقع : فريدم هاوس منظمة للجوسسة و العبث بالشعوب منذ 1941 ممولة من الحكومة الفدرالية الأمريكية


و باش تفهمو قوة فريدم هاوس بش نذكركم بزوز مواقف

لما الجيش المصري يقتل و يسحل طفلة في الكياس، الحكومة الأمريكية تعبر عن قلقها، قلقها برك

و لما الجيش المصري يفتح تحقيق في نشاط فريدم هاوس على أرضو تقلبت الدنيا قلبان 
و هاو رد الخارجية و الدفاع (إيه نعم و الدفاع )الأمريكان 

حذرت وزيرة الخارجية الاميركية هيلاري كلينتون من ان واشنطن قد تعيد النظر في المساعدات الاميركية لمصر في حال استمرار الحملة الامنية على المنظمات الاهلية

وقالت كلينتون  " اتيحت لي فرصة لتجديد قلق الولايات المتحدة العميق بشأن ما يحدث للمنظمات غير الحكومية في مصر، ونحن نعتقد أنه لا يوجد أساس للتحقيقات في أنشطة تلك المنظمات أو مداهمتها ومصادرة ممتلكاتها ، ومن المؤكد انه ليس هناك أساس لقرار منع أعضائها من السفر

ومضت كلينتون قائلة " لقد كنا واضحين فيما يتعلق بالتداعيات التي يمكن أن تنجم من مثل هذا الموقف على كافة جوانب العلاقات بين مصر والولايات المتحدة ، ولا نريد لذلك ان يحدث

ووصلت كلينتون إلى ذروة تحذيراتها عندما قالت "لقد عملنا سويا بجد وعلى مدى سنوات لترتيب مساعدة مالية ودعم كبير للإقتصاد المصري وللإصلاحات الديموقراطية التي تحدث في مصر، ومن المؤكد أننا سنعيد النظر عن كثب عندما يأتي وقت التحقق من جدوى تلك المساعدات، بحيث نستطيع أن نقرر مدى إمكانية إتاحة أموال المساعدات الأمريكية في ظل الظروف الجديدة في مصر

كما أجرى وزير الدفاع الأمريكي ليون بانيتا اتصالا هاتفيا بنظيره المصري المشير محمد حسين طنطاوي،  لحثه على الإسراع بإلغاء حظر السفر المفروض على المتهمين الأمريكيين في قضية التمويل الأجنبي

وشن السيناتور باتريك ليهي ، وهو رئيس اللجنة الفرعية المسؤولة عن المساعدات الأجنبية في الكونغرس هجوما لفظيا شرسا على ماقال إنه حملة مصرية شرسة على جماعات ومنظمات المدافعة عن حقوق الإنسان والديموقراطية العاملة في مصر بتمويل من الحكومة الأمريكية، وحذر من أن بوسع الكونغرس وقف كافة أشكال المساعدات الامريكية لمصر مالم يتوقف هذا المسلك من جانب القاهرة

معناها حتى المساعدات بش يوقفوها! هذا الكل على مجرد التحقيق

الي نسى و موش مصدق، هاو الرابط متاع
 BBC : http://www.bbc.co.uk/arabic/mobile/middleeast/2012/02/120205_egypt_ngo_trial.shtml

نتصور جماعة المؤامرة مزالو يتكريكو؟

بعض الرؤوس متع فريدم هاوس

ويليام هاورد تافت : صقر من صقور إدارة جورج بوش الإبن

بيتر أكرمان : المنظر للحروب اللادموية
  non violent conflicts
 الي تبحث إستعمار الشعوب دون بعثان المارينز

كينيث أدلمان : من المحافظين عضو في 
 Defense Policy Board 
متع البنتغون و أكبر المدافعين و المنظرين لقنابل الحب و صواريخ السلام و دبابات الديمقراطية الي غزات العراق

 آذر نفیسی : الإيرانية المولد الي انتقدتها صحيفة القواردين البريطانية بأنها من أكبر الداعمين للفوضى الخلاقة و الحرب الشاملة
و هذا الأرتيكل
http://www.guardian.co.uk/world/2003/feb/24/worlddispatch.usa

وهل يخفى القمر؟ دونالد رامسفيلد شخصيا إيه نعم

على السيت متع فريدم هاوس تلقاو الأسامي هاذي الكل، ردو بالكم إتطيحو في المؤامرة و تحطو الأسامي الي تلقاوها على قوقل و تحاولو تعرفوهم شكون

فهمتو أناهي الديمقراطية الي تحب عليها و تصرف عليها فريدم هاوس؟

إش قالو في فريدم هاوس؟

فمة برشة مرضة بعقلية المؤامرة كيفي، حكاو على فريدم هاوس، تره ناخذو بعض الأمثلة 

ذكرت صحيفة فاينانشال تايمز أن فريدم هاوس هي واحدة من العديد من المنظمات التي اختارتها وزارة الخارجية الامريكية للحصول على تمويل من أجل "أنشطة سرية" داخل إيران
 http://news.ft.com/cms/s/48d26298-c052-11da-939f-0000779e2340,_i_rssPage=de095590-c8f4-11d7-81c6-0820abe49a01.html

وطلب في 8 ماي  2006، نائب رئيس مجلس إدارة مؤسسة فريدوم هاوس أمناء مجلس الشيوخ الأميركي إلى زيادة حصة التمويل للمنظمات غير الحكومية التي تهدف إلى دعم الناشطين  في مجهودات تنظيمهم لمحاولات انقلابات على الحكومات
http://www.foreign.senate.gov/imo/media/doc/PalmerTestimony060608.pdf

و استمعت في ماي 2001، لجنة المنظمات غير الحكومية التابعة للأمم المتحدة للحجج المعارضة لفريدوم هاوس. حيث عبر ممثلو كوبا أن المنظمة هي أداة السياسة الخارجية الأميركية و مرتبطة بوكالة المخابرات المركزية
 CIA
 و  قدم دليلا و حججا عن أنشطة فريدوم هاوس التي كانت ذي دوافع تدخل سياسية و التي نفذت ضد حكومتهم
 كما تسائل عن اسباب عدم وجود انتقادات تجاه انتهاكات حقوق الإنسان التي ترتكبها الولايات المتحدة في تقارير فريدوم هاوس السنوية بالرغم ان هذه الانتهاكات كانت موثقة توثيقا جيدا من قبل تقارير أخرى، مثل هيومن رايتس ووتش
 وقدمت أيضا دول أخرى مثل الصين والسودان انتقادات. واستفسر الممثل الروسي لماذا تدافع هذه المنظمة، وهي منظمة غير حكومية عن حقوق الإنسان، و لكنها كانت ضد إنشاء المحكمة الجنائية الدولية
http://www.un.org/News/Press/docs/2001/ngo432.doc.htm

دعت روسيا، التي تم تحديدها من قبل فريدوم هاوس على أنها "غير حرة"، فريدم هاوس بأنها  متحيز واتهمتها  بخدمة مصالح الولايات المتحدة
 سيرجي ماركوف ،  النائب عن حزب روسيا المتحدة نعت  فريدم هاوس ب "Russophobic" 
http://www.themoscowtimes.com/stories/2008/01/17/011.html


دانيال تريزمان  أستاذ العلوم السياسية جامعة كاليفورنيا، انتقدت تقييم فريدم هاوس حيث تضع روسيا و الإمارات العربية المتحدة في نفس المرتبة في الحقوق السياسية و في الحريات المدنية في نفس المرتبة مع اليمن

Treisman, Daniel (2011). The Return: Russia's Journey from Gorbachev to Medvedev. Free Press. pp. 341–352. ISBN 978-1-4165-6071-5.


في ديسمبر 2007 إنتقد النائب الأمريكي  رون بول فريدم هاوس لإدارة برنامج تموله الولايات المتحدة في أوكرانيا حيث تم استهداف الكثير من هذه الاموال لمساعدة مرشح 
واحد معين 

وقال بول "جزء واحد الذي نعرفه حتى الآن هو أن حكومة الولايات المتحدة، من خلال الوكالة الأميركية للتنمية الدولية ، منحت الملايين من الدولارات لمبادرة التعاون المشترك بين بولندا وأمريكا وأوكرانيا، والذي تديره فريدم هاوس
ثم ترسل فريدم هاوس أموال حكومة الولايات المتحدة إلى العديد من المنظمات غير الحكومية الأوكرانية ، وهذا سيكون سيئا بما فيه الكفاية، وسوف يشكل في حد ذاته تدخلا في الشؤون الداخلية لدولة ذات سيادة، ولكن، ما هو أسوأ من ذلك أن  هذه المنظمات الممنوحة في أوكرانيا كانت تساند وبشكل صارخ  المرشح الرئاسي فيكتور يوشينكو 
http://paul.house.gov/index.php?option=com_content&task=view&id=217&Itemid=60


نعوم تشومسكي و إدوارد هيرمان انتقدو فريدم هاوس و قالو الي لا ديمقراطية لا والو و ماهي كان غطاء لرعاية المصالح الأمريكية

  تشومسكي وهيرمان  يكتبو في عام 1979، فريدم هاوس راقبت الإنتخابات من إيان سميث في روديسيا ، ووجدت أنها "عادلة"، لكنها وجدت في انتخابات 1980 التي فاز بها موجابي تحت إشراف البريطاني مشكوك فيها
Chomsky and Herman: Manufacturing Consent, Vintage 1994, p28

في نفس الكتاب  تشومسكي وهيرمان يقولون إن  فريدم هاوس  تنتقد بشكل مفرط الدول المعارضة لمصالح الولايات المتحدة في حين يجري تعاطف على نحو غير ملائم للأنظمة الداعمة لمصالح الولايات المتحدة

و  يعطي المؤلفان مثال السلفادور في أوائل الثمانينات الي قام فيها الجيش بذبح المواطنين في الساحات و لكن فريدم هاوس صنفت الإنتخابات على أنها رائعة

و يتهم نعوم شاومسكي فريدم هاوس بأنها ذراع لوكالة الإستخبارات الأمريكية
http://www.thirdworldtraveler.com/Herman%20/Manufac_Consent_Prop_Model.html


باهي ياسين على مراد الله، يخرم و حدو و مغروم بجيمس بوند، و نواب البرلمان و فايننشل تايمز وممثلي روسيا و كوبا في الأمم المتحدة و أساتذة في السياسة و نعوم شاومسكي هاذم زادة على مراد الله؟ ضايعين فيها زادة؟



باش نلخص : فريدم هاوس منظمة جاسوسية أمريكية تجند عملاء يبيعو أنفسهم و أوطانهم، مقابل فلوس و دعم و ردانهم زعماء، مؤسسة لخيانة الأوطان



برشة منكم فاقو إلي الكثير من ماهو مكتوب مترجم، حاولت نترجم بأحسن ما عندي



هاذا الجزء الأول متاع المقال، حاولت نعرف فيه بشنية فريدم هاوس و كيفاش تخدم و شكون معاها. المقال إتطلب برشة بحث و تدقيق



إن شاء الله في الجزء الثاني نحكي على فريدم هاوس تونس و بش نعطي أسماء، مع إني نتمنى الي صحافي محترف يقوم ببحث أعمق و إنه وكيل الجمهورية يفتح تحقيق في الخيانة العظمى ضد كل من باع بلادو لأجل حفنة دولارات



مازلت ما كتبتش الجزء الثاني، كل من عنده معلومات : مرحبا